🌹Duniya azmaishon aur fitno ki jagah hai🌹
بسم اللہ الرحمٰن الرحیم
Duniya amal karne ki jagah hai aur akhirat jaza pane ki , to mominon ko badla jannat aur kafiroon ko jahannum ki soorat mein miley ga .
To jab Jannat Tayyab aur achhi cheez hai to us mein daakhil bhi wohi hoga jo ke achha aur Tayyab hoga aur phir Allah Ta’ala Tayyab aur paak saaf hai to woh qubool bhi Tayyab aur paak saaf cheez hi karta hai isiliye Allah Ta’ala ka apne bandon mein yeh tareeqa raaij hai ke woh apne bandon ko azmaane ke liye masaaib aur fitna mein dalta hai taake yeh pata chal sake ke momin kaun aur kafir kaun hai aur jhute aur sachey ke darmiyan tameez hosake jaise ke Allah Ta’ala ka farmaan hai :
” Kya logon ne yeh gumaan kar rakha hai ke unke sirf is daawe par ke hum imaan laaye hain hum inhen baghair aazamaaye hue hi chhod denge? Unse pahlo ko bhi hum ne khoob aazmaaya tha yaqeenan Allah Ta’ala unhen bhi jaan le ga jo sach kehte hain aur unhen bhi maloom kar lega jo ke jhute hain”
📖(Al-Ankaboot :2-3)
To kamyabi aur nijaat us waqt tak mukammal nahi hogi jab tak ke imtehan na hojaye aur Tayyab khabees se alehda na hojaye aur momin aur kafir ka pata na chal jaye jaisa ke Allah Subhanahu Taa’la ka farmaan hai :
“Jis haal par tum ho isi par Allah Ta’ala imaan walon ko na chhod dega jab tak ke pak aur napak ko alag na kardey aur na hi Allah Ta’ala aisa hai ke tumhe ghaib se aagah kardey ga”
📖Al-Imran 179
Woh azmaish jisme Allah Ta’ala apne bandon ko mubtala karta hai taake momin aur kafir ke darmiyan tameez ho sake uska zikar Allah ke is farmaan mein hai :
“Aur hum kisi na kisi tarah tumhari azmaish zaroor karenge dushman ke dar se, bhook pyaas se, maal wa jaan aur phalon ki kami se, aur unpar sabr karne walon ko khushkhabri de dijiye jinhein koi museebat aati hai to keh diya karte hain ke hum to khud Allah Ta’ala ki milkiyat hain aur hum usi ki taraf lautne wale hain, un par unke Rabb ki rahmaten aur nawazishen hain aur yahi log hidaayat Yafta hain”
📖Al-Baqara 155-157
To Allah Ta’ala apne bandon ko azmaish mein mubtala karta aur sabr karne walon se mohabbat karta aur unhen jannat ki khushkhabri deta hai .
Aur aise hi Allah Ta’ala apne bandon ko jihaad ke sath bhi aazmaata hai,
Farmaan e Baari Ta’ala hai :
“Kya tum yeh samajh baithe ho ke tum jannat mein chale jao ge halaanke abhi tak Allah Ta’ala ne yeh zahir nahi kiya ke tum mein se Jihaad karne wale kaun hain aur sabr karne wale kaun hain ?”
📖Al-Imran 142
Aur isi tarah maal wa aulaad bhi fitna hain jis mein Allah Ta’ala apne bandon ko mubtala karta hai taake yeh maloom karle ke kaun shukr karta aur kaun na shukri karte hue un mein mashgool rehta hai
Farmaan e Bari Ta’ala hai :
” Aur tum is baat ko jaan lo ke tumhare maal aur tumhari aulaade ek imtehaan ki cheez hain aur is baat ko bhi jaan lo ke Allah Ta’ala ke yahan bohat bada ajar hai. ”
📖Al-Anfaal : 28
Allah Ta’ala baaz auqaat museebaton aur baaz auqaat neymaton ke sath azmaish mein dalta hai ta ke yeh pata chal sake ke kaun shukrguzaar aur kaun nashukra aur kaun ita’at guzaar aur kaun nafarman hai to phir inhen qayamat ke roz badla dega.
Allah Ta’ala farmata hai :
” Hum azmaish ke liye har ek ko buraee aur bhalai mein mubtila karte hain aur tum sab hamari taraf lautaaye jaoge”.
📖Al-Ambiya : 35
Aur phir yeh azmaish bhi imaan ke aitbaar se hoti hai to logon mein sab se ziyada sakht azmaish Ambiya ki phir usse kam darje ki phir usse kam wale ki .
Nabi sallallaho alaihi wasallam ka irshad hai :
” Mujhe tanha itna tez bukhaar hota hai jitna ke do admiyon ko hota hai”
📖Sahih bukhari hadees number 5648
Allah Ta’ala ham ko kai qism ki azmaish mein dalta hai. Baaz auqaat to hame museebaton aur fitne mein daal kar imtehaan leta hai ta ke momin aur kafir aur ita’at guzaar aur nafarman aur shukr guzaar aur nashukre ka pata chal sake .
Aur baaz auqaat jab uske bande nafarmani karte hain to woh apne bandon ko museebaton mein mubtila kar ke unhen sikhata hai ta ke woh us nafarmani se baz aa jayen .
Jaisa ke Allah Ta’ala farmata hai.
” Tumhe jo kuch bhi museebatein aati hain woh tumhare apne hathon ke kartoot ka badla hai aur woh to sab baton se to dar guzar farma deta hai”.
📖Ash- Shuara : 30
Allah Subhana o taala ka farmaan hai :
” Aur hum ne inhen azaab mein bhi pakda lekin yeh log na apne Rabb ke samne jhuke aur naa hi unhon ne aajzi ikhtiyar ki”.
📖Al-Momin : 76
Allah taala apne bandon par bohat zyada Raheem hai aur ummat par baar baar azmaish lata hai ta ke woh wapas lout aayen aur gunaaho se tauba kar ke Allah Ta’ala ki haraam kardah cheezon ko tark kar de taa ke Allah taala inhen bakhash de .
Allah Ta’ala Ka farmaan hai :
” Aur kya unko yeh dikhayi nahi deta ke yeh log har saal ek ya do baar kisi na kisi aafat mein phanse rehte hain phir bhi na tauba karte aur naa hi naseehat qubool karte hain”.
📖At- Taubah : 126
Aur Allah Ta’ala ki rahmat hai ke woh gunaaho ki saza duniya mein bhi deta hai ke ho sakta hai ke log apne gunaho se baaz ajaye aur khud me sudhaar le aayen aur maut se pahle pahle Allah ki taraf rujoo kar len.
Allah Ta’ala ka farmaan hai.
” Aur yaqeenan hum inhen qareeb ke chhote se baaz azaab iss bade azaab ke siwa chakhayenge taa ke woh laut ayen”
📖As-Sajda : 21
Aur baaz auqaat Allah Ta’ala apne bandon ko museebaton mein isliye mubtila karta hai ke unke darjaat buland kare aur unki buraiyan khatam kare.
Jaisa ke farmaan nabwi sallallaho alaihi wasallam hai :
“Kisi bhi musalman ko koi takleef, bemari, gham, pareshani, afsos hatta ke agar koi kaanta bhi chubhta hai to uski binaa par Allah Ta’ala uske gunah maaf kar deta hai.”
📖Sahih bukhari hadees number 5641
No comments:
Post a Comment